15 ਸਾਲ ਦੀ ਉਮਰ ‘ਚ ਡੈਬਿਊ, 23 ਸਾਲ ਦੀ ਉਮਰ ‘ਚ ਵਿਆਹ ਅਤੇ ਧਰਮ ਪਰਿਵਰਤਨ, ਜਾਣੋ ਆਇਸ਼ਾ ਟਾਕੀਆ ਦੀਆਂ ਖਾਸ ਗੱਲਾਂ

2766

ਅੱਜ ਸਲਮਾਨ ਖਾਨ ਦੀ ‘ਵਾਂਟੇਡ’ ਫੇਮ ਆਇਸ਼ਾ ਟਾਕੀਆ ਦਾ ਜਨਮਦਿਨ ਹੈ। 10 ਅਪ੍ਰੈਲ 1986 ਨੂੰ ਮੁੰਬਈ ‘ਚ ਜਨਮੀ ਆਇਸ਼ਾ ਟਾਕੀਆ ਕਿਸੇ ਸਮੇਂ ਇੰਡਸਟਰੀ ‘ਚ ਸਭ ਤੋਂ ਚਰਚਿਤ ਅਦਾਕਾਰਾ ਸੀ। ਪਰ ਵਿਆਹ ਤੋਂ ਬਾਅਦ ਉਨ੍ਹਾਂ ਨੇ ਫਿਲਮੀ ਦੁਨੀਆ ਤੋਂ ਜੋ ਦੂਰੀ ਬਣਾ ਲਈ, ਉਹ ਅੱਜ ਤੱਕ ਬਰਕਰਾਰ ਹੈ। ਅਜਿਹੇ ‘ਚ ਉਨ੍ਹਾਂ ਦੇ ਪ੍ਰਸ਼ੰਸਕ ਇਹ ਜਾਣਨ ਲਈ ਬੇਤਾਬ ਹਨ ਕਿ ਆਇਸ਼ਾ ਟਾਕੀਆ ਹੁਣ ਕਿੱਥੇ ਹੈ ਅਤੇ ਕੀ ਕਰ ਰਹੀ ਹੈ।

ਆਇਸ਼ਾ ਟਾਕੀਆ ਗੁਜਰਾਤੀ ਪਰਿਵਾਰ ਨਾਲ ਸਬੰਧ ਰੱਖਦੀ ਹੈ। ਉਸ ਦੇ ਪਿਤਾ ਗੁਜਰਾਤੀ, ਮਾਂ ਅੱਧੀ ਮਹਾਰਾਸ਼ਟਰੀ ਅਤੇ ਅੱਧੀ ਬ੍ਰਿਟਿਸ਼ ਹੈ। ਉਸਨੇ ਸੇਂਟ ਐਂਥਨੀ ਸਕੂਲ ਤੋਂ ਆਪਣੀ ਸਕੂਲੀ ਪੜ੍ਹਾਈ ਪੂਰੀ ਕੀਤੀ ਹੈ।ਆਇਸ਼ਾ ਨੇ 15 ਸਾਲ ਦੀ ਉਮਰ ‘ਚ ਬਤੌਰ ਮਾਡਲ ਡੈਬਿਊ ਕੀਤਾ ਸੀ। ਪਰ, ਕੈਮਰੇ ਦਾ ਸਾਹਮਣਾ 4 ਸਾਲ ਦੀ ਉਮਰ ਤੋਂ ਸ਼ੁਰੂ ਹੋ ਗਿਆ ਸੀ।

ਆਇਸ਼ਾ ਨੇ ਆਪਣੇ ਬਾਲੀਵੁੱਡ ਕਰੀਅਰ ਦੀ ਸ਼ੁਰੂਆਤ 2004 ਵਿੱਚ ਅਜੇ ਦੇਵਗਨ ਸਟਾਰਰ ਫਿਲਮ ‘ਟਾਰਜ਼ਨ: ਦਿ ਵੰਡਰ ਕਾਰ’ ਨਾਲ ਕੀਤੀ ਸੀ, ਜਿਸ ਵਿੱਚ ਉਹ ਵਤਸਲ ਸੇਠ ਦੇ ਨਾਲ ਨਜ਼ਰ ਆਈ ਸੀ।ਪਹਿਲੀਆਂ ਦੋ ਫ਼ਿਲਮਾਂ ਨਾਲ ਦਰਸ਼ਕਾਂ ਦਾ ਦਿਲ ਜਿੱਤਣ ਤੋਂ ਬਾਅਦ ਉਸ ਦੀਆਂ ਅਗਲੀਆਂ ਫ਼ਿਲਮਾਂ ਕੁਝ ਖਾਸ ਕਮਾਲ ਨਹੀਂ ਕਰ ਸਕੀਆਂ। ਜਿਸ ਤੋਂ ਬਾਅਦ ਉਸਨੇ ਇੱਕ ਵਾਰ ਫਿਰ 2006 ਵਿੱਚ ਆਈ ‘ਡੋਰ’ ਨਾਲ ਦਰਸ਼ਕਾਂ ਦਾ ਦਿਲ ਜਿੱਤ ਲਿਆ।ਆਇਸ਼ਾ ਟਾਕੀਆ ਨੇ ਸਲਮਾਨ ਖਾਨ ਨਾਲ ‘ਵਾਂਟੇਡ’ ਲਈ ਵੀ ਕਾਫੀ ਤਾਰੀਫਾਂ ਹਾਸਲ ਕੀਤੀਆਂ। ਇਸ ਦੇ ਲਈ ਉਨ੍ਹਾਂ ਨੇ ਕਈ ਐਵਾਰਡ ਵੀ ਆਪਣੇ ਨਾਂ ਕੀਤੇ

ਪਰ 23 ਸਾਲ ਦੀ ਉਮਰ ‘ਚ ਉਨ੍ਹਾਂ ਨੇ ਅਚਾਨਕ ਵਿਆਹ ਦਾ ਫੈਸਲਾ ਲੈ ਕੇ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ। ਆਇਸ਼ਾ ਟਾਕੀਆ ਨੇ 2009 ‘ਚ ਫਰਹਾਨ ਆਜ਼ਮੀ ਨਾਲ ਵਿਆਹ ਕਰਵਾ ਲਿਆ ਅਤੇ ਉਸ ਲਈ ਆਪਣਾ ਧਰਮ ਬਦਲ ਲਿਆ। ਆਇਸ਼ਾ ਟਾਕੀਆ ਦਾ ਫਰਹਾਨ ਆਜ਼ਮੀ ਨਾਲ ਇਕ ਬੇਟਾ ਵੀ ਹੈ, ਜਿਸ ਦਾ ਨਾਂ ਮਿਕਾਇਲ ਆਜ਼ਮੀ ਹੈ।
ਆਇਸ਼ਾ ਆਪਣੇ ਬੁੱਲ੍ਹਾਂ ਦੀ ਸਰਜਰੀ ਨੂੰ ਲੈ ਕੇ ਵੀ ਸੁਰਖੀਆਂ ‘ਚ ਰਹੀ ਹੈ। ਕਈ ਵਾਰ ਆਪਣੀ ਲਿਪ ਸਰਜਰੀ ਕਾਰਨ ਉਹ ਯੂਜ਼ਰਸ ਦੇ ਨਿਸ਼ਾਨੇ ‘ਤੇ ਰਹੀ। ਆਇਸ਼ਾ ਇਨ੍ਹੀਂ ਦਿਨੀਂ ਫਿਲਮੀ ਦੁਨੀਆ ਤੋਂ ਦੂਰ ਆਪਣੀ ਨਿੱਜੀ ਜ਼ਿੰਦਗੀ ਦਾ ਆਨੰਦ ਮਾਣ ਰਹੀ ਹੈ, ਜਿਸ ਦੀ ਝਲਕ ਉਸ ਦੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਦੇਖੀ ਜਾ ਸਕਦੀ ਹੈ।